Ta’ Barra Ġewwa Magħna

Illejla, l-Erbgħa 8 t’April 2020, fit-8.30pm*, erba’ kittieba Maltin li jgħixu barra se jingħaqdu magħna virtwalment biex jaqrawlna siltiet minn xogħlijiethom. Magħhom se jissieħeb ukoll xi ħadd ieħor…

Idħol fl-avveniment minn din il-ħolqa: https://meet.google.com/mur-tfxp-znq.

(*Se nibdew iktar tard minħabba l-konferenza stampa mħabbra għal-lejla.)

Ta' Barra Ġewwa Magħna

Idħol f’din il-ħolqa għal iktar dettalji: https://www.facebook.com/events/153589042634617/

Il-Kittieba

dsc 2795 1024x678 crop

Nadia Mifsud twieldet fl-1976. Trabbiet Bormla, kibret San Tumas, u ta’ 22, wara li ggradwat fil-Franċiż, marret tgħix Franza fejn kompliet tistudja l-letteratura.

Tgħallem, tittraduċi, u tikteb kemm il-poeżija u anke l-proża. Xogħlijietha inqalbu għal diversi lingwi, ġiet mistiedna għal għadd ta’ festivals fl-Ewropa, u anke fin-Nicaragua u l-India, u l-poeżiji u n-novelli tagħha dehru f’kull edizzjoni riċenti ta’ Leħen il-Malti.

Ritratt ta’ Virginia Monteforte.


Antoine Cassar. Photo by Sunshine Coast Writers Festival

Antoine Cassar (Londra, 1978) huwa poeta u traduttur. Erbgħin Jum (40 Days, EDE, 2017), poeżija tul ta’ ktieb dwar trawmi tat-tfulija, id-dipressjoni u l-mixi bħala awtoterapija, rebħet il-Premju Nazzjonali tal-Ktieb, u tinsab fix-shortlist tal-European Poet of Freedom Award 2020. Passaport (2009), poeżija stampata f’forma ta’ anti-passaport għal kull poplu u kull pajsaġġ, hija ppubblikata fi 11-il lingwa, u ġiet adattata għall-palk f’Malta, fi Franza u fil-Belġju. Fl-2009, il-kompożizzjoni multilingwi Merħba, a poem of hospitality ngħatat il-United Planet Writing Prize.

Bħala traduttur letterarju, Cassar qaleb ix-xogħol ta’ diversi awturi Maltin, bl-Ingliż (fost l-oħrajn in-novelli ta’ Pierre J. Mejlak, rebbieħ tal-Premju tal-UE għal-Letteratura fl-2014) u bl-Ispanjol (Troyano, ta’ Alex Vella Gera, ġie ppubblikat minn Libros de mentira, iċ-Ċile, f’Mejju 2019).

Ritratt ta’ Sunshine Coast Writers Festival.


Mark Anthony Fenech Lorraine Piscopo

Mark Anthony Fenech twieled fl-1988. Għex minn tfulitu sa żgħożitu ż-Żejtun u Wied il-Għajn. Bħalissa jgħix il-Lussemburgu fejn beħsiebu jibqa’ għalkemm jixtieq jgħix l-Iskozja jew l-Iżlanda u anke Svalbard. Fost gostih hemm il-mużika metal, il-wiski Skoċċiż, il-birra, Warhammer 40,000, kif ukoll kotba u films ta’ fantażija u fantaxjenza. Ittraduċa r-rumanz ta’ Agatha Christie And Then There Were None għall-Malti bit-titlu U Ma Kien Fadal Ħadd. It-Tawmaturgu: il-Ħmura ta’ Filgħaxija huwa l-ewwel rumanz li ppubblika.

Ritratt ta’ Lorraine Piscopo.


Alex Vella Gera - Ray Attard

Alex Vella Gera rebaħ bosta premji prestiġjużi u kiteb, fost oħrajn, L-Antipodi, Is-Sriep Reġgħu Saru Velenużi u Trojan.

Fl-2009 isem l-awtur deher fil-gazzetti lokali meta n-novella tiegħu Li Tkisser Sewwi dehret f’pubblikazzjoni studenteska Realtà. L-istorja hija rakkont tal-avventuri sesswali ta’ individwu irresponsabbli u bi ftit jew xejn rigward għan-nisa u d-dinjità tal-bniedem. L-istorja pproduċiet dibattitu pubbliku u każ tal-qorti li eventwalment wassal għal reviżjoni tal-liġijiet antiki taċ-ċensura f’Malta.

Apparti l-produzzjoni letterarja tiegħu bħala kittieb ta’ rumanzi, Alex Vella Gera esperimenta ukoll b’forom oħra ta’ espressjoni letterarja u artistika, fosthom il-fotografija, il-mużika (mal-grupp Hunters Palace) u films.

Kiteb flimkien mad-direttur Peter Sant l-iscreenplay tal-feature film indipendenti Malti Baħar Żmien.

Ritratt ta’ Ray Attard.


Mistery Guest

Kittieb/a Misterjuż/a. Tgħid min se tkun din il-persuna?