Studenti Ġermaniżi f'Pembroke

It-Tnejn, 20 ta' Ġunju, 2005

Nhar it-Tnejn, 20 ta' Ġunju, fis-7.30pm, fis-sala tal-Kunsill ta' Pembroke, għadd ta’ awturi Maltin iltaqgħu ma’ studenti Ġermaniżi li qed jaqraw u jagħmlu riċerka dwar il-letteratura kontemporanja Maltija. L-istudenti huma mill-Gymnasium an der Schweizer Allee ta’ Dortmund (Aplerbeck). Aplerbeck tinsab fil-punent tal-Ġermanja u hija wieħed mill-għaxar distretti muniċipali fi ħdan il-belt ta’ Dortmund.

Iż-żjara kulturali f’Malta ta’ dawn il-ħmistax-il student u studenta ta’ tmintax-il sena u ż-żewġ għalliema tagħhom, fosthom is-Sur Wilfried Renkhoff, saret bejn it-18 u l-24 ta’ Ġunju, 2005, u qabel ma waslu Malta diġà kien inkiteb dwarha f’waħda mill-gazzetti ta’ Dortmund. Bħala parti mill-kors tagħhom, kellhom test interessanti ħafna dwar wieħed mit-testi Maltin li studjaw fil-verżjoni tradotta għall-Ingliż: "/No adjective describe story/" ta' Clare Azzopardi.

Dakinhar tal-laqgħa bejn il-kittieba ta’ Inizjamed u l-istudenti Ġermaniżi, fis-6.30pm, is-sindku tal-Kunsill ta' Pembroke, is-Sur Joe Zammit, mexxa dawra madwar is-siti storiċi u l-proġett ta’ tħawwil tas-siġar f’Pembroke. Għal dawn l-attivitajiet attendew ukoll xi studenti Maltin. Il-kittieba Maltin kienu Clare Azzopardi, Norbert Bugeja, Maria Grech Ganado, Adrian Grima, u Simone Inguanez.

Waqt il-laqgħa ta’ diskussjoni li bdiet fis-7.30pm, il-kittieba Maltin qraw xogħol minn tagħhom, bil-Malti u bl-Ingliż, u mbagħad saret diskussjoni ma' l-istudenti li tkellmu anki dwar il-proġett ta' riċerka tagħhom dwar il-letteratura kontemporanja Maltija.